Түркі академиясын қаржыландыруға бюджеттен 1 млн доллар бөлінді – Асхат Аймағамбетов
2022 жылғы 21 сәуір 13:08

Түркі академиясын қаржыландыруға бюджеттен 1 млн доллар бөлінді – Асхат Аймағамбетов

НҰР-СҰЛТАН. ҚазАқпарат – Халықаралық Түркі академиясын қаржыландыру үшін ел бюджетінен 1 млн доллардан астам қаржы бөлінді. Бұл туралы ҚР Білім және ғылым министрі Асхат Аймағамбетов айтып берді, деп хабарлайды ҚазАқпарат тілшісі.

«Түркі академиясының қызметін оның құрамына кіретін барлық елдер қаржыландырады. Бұл Түркия Республикасы, Қырғызстан, оның ішінде Қазақстан. Олар тиісінше осы ұйымның және дәл түркітілдес елдердегі басқа да ұйымдардың қызметін мөлшерлес шамалас көлемде қаржыландырады», - деді Асхат Аймағамбетов Сенат отырысынан кейін тілшілерге берген сұхбатында.

Министрдің айтуынша, әрбір ұйымда мемлекеттердің қаржыландыру үлесі штаб-пәтердің орналасқан жеріне байланысты өзгеріп отырады.

«Мысалы штаб-пәтері Бакуде орналасқан ТүркПА-ға келсек, Бакудың қаржыландыру үлесі оның тең жартысын құрайды. Түркиядағы ТҮРКСОЙ және басқа да ұйымдар бар, олардың шамамен 46-48 пайызы Түркия бюджетінен қамтамасыз етіледі. Бұл жағдайда Түркі академиясы Қазақстан аумағында болғандықтан, қалыптасқан дәстүр мен практика бойынша біздің жарнамыз шамамен 46 пайызды құрайды. Бюджет жыл сайын өзгеріп отырады. Биыл Қазақстан бюджетінен 1 миллион доллардан астам қаражат бөлінді», - деп түсіндірді А. Аймағамбетов.

Айта кетейік, бүгін Сенат түркітілдес мемлекеттермен ынтымақтастыққа қатысты құжатты қабылдады. «ҚР Үкіметі мен Түркі академиясы арасындағы Түркі академиясын орналастырудың шарттары мен тәртібі туралы келісімді ратификациялау туралы» Заңы қабылданды.

Бұған дейін Асхат Аймағамбетов Түркі академиясына жаңа ғимарат салынбайтынын айтқан еді.


Ұқсас жаңалықтар
Серіктестер жаңалықтары

Jańalyqtar

Үрдіс

MURAǴAT