Тұңғыш Президент күні ШҚО-да үш егіз дүниеге келді
1 желтоқсанға қараған түні үш егіз өмірге келді: ұл мен қыз және екі жұп қыздар. Сондай-ақ, осы күні перзентті болған Өскемен тұрғыны ұлына Нұрсұлтан деп ат қойды.
«Менің 4 қызым бар. Енді нағыз батыр дүниеге келді, салмағы - 3,6 кг. Ұлымның болашағы жарқын болып, көптеген белестерді бағындыратынына сенімдімін. Бейбіт заманда өмір сүріп отырғанымыз үшін Елбасына алғыс айтамын», - деп ағынан жарылды Нұрсұлтанның анасы Айнұр Қобланова.
Егіздер Владимир мен Даринаның анасы Екатерина да ана атанғаны үшін бақытты. Ал қалған егіз қыздарға ата-анасы бір-біріне ұқсатып Әсел мен Әсем, Еркем мен Көркем деп ат қойыпты. Бақытты отбасыларға Елбасы атынан сыйлықтар берілді. Онда балаларға арналған автокресло, қоларба, кереует бар, ал ата-аналар гүл шоғы мен сәбиге күтім жасауға қажетті дәрі-дәрмек қобдишасына ие болды.
«Бүгінгі Тұңғыш Президентінің күні мерекесінің мәні зор. Біздің Елбасы бүгінде ана мен бала денсаулығына ерекше көңіл бөліп отыр», - деп атап өтті ШҚО әкімінің орынбасары Әсем Нүсіпова.
Оның айтуынша, бұл акция облыстың барлық аудан, қалаларында өтіп жатыр. Бүгін туылған барлық сәбиге сыйлық беріледі. Ол сонымен қатар Тәуелсіздік күні қарсаңында Ана мен баланы аялау орталығының 32 маманы Өскеменнен пәтерге ие болатынын айтып өтті. Ал жаңа жылдан бастап алғашқы жедел жәрдем дәрігерлерінің, атап айтқанда мыңнан астам маманның жалақысы 20 пайызға көтеріледі. 