Төтенше жағдайлар департаменті алматылықтарға аязға байланысты ескерту жасады

АЛМАТЫ. ҚазАқпарат - 25 градусқа дейін жеткен қатты аязға байланысты ТЖД мамандары Алматы тұрғындарын қала сыртына шықпауға және жылы киінуге шақырды, деп хабарлайды ҚазАқпарат тілшісі.

Синоптиктердің болжамына сәйкес, 12-16 қаңтар аралығында мегаполисте ауа температурасы -25 градусқа дейін төмендейді. Бұл Алматы қаласы үшін қауіпті метеорологиялық құбылысты білдіреді.

«Осыған байланысты, Алматы қаласының Төтенше жағдайлар департаменті тұрғындардан қысқы кезеңде сақтық шараларын ұстануды сұрайды. Көшеге ұзақ серуендемеңіз, қажетсіз қаладан тыс жерлерге бармаңыз, көшеге шыққанда жылы киініңіз»,- делінген хабарламада.

Сонымен қатар, ведомство мүдделі мемлекеттік органдар мен ұйымдарға халықтың тыныс-тіршілігін қамтамасыз ету объектілеріне бақылауды күшейту бойынша қосымша шаралар қабылдау туралы ақпараттық хабарламалар жіберді.

Бұған дейін 12-13 қаңтарда Алматыда мектеп оқушылары мен колледж студенттері қашықтан оқу форматына көшкені туралы жазған болатынбыз.