Төрелік және аралық соттар құзыреті нығаяды - Парламент

АСТАНА. 20 маусым. ҚазАқпарат - Бүгін Парламент Сенатының жалпы отырысында палата депутаттары «Қазақстан Республикасының кейбір заңнамалық актілеріне төреліктің және аралық соттың қызметін жетілдіру мәселелері бойынша өзгерістер мен толықтырулар енгізу туралы» заң жобасы бойынша келісім комиссиясының ұсыныстарын талқылады.

Нәтижесінде аталған заң қабылданды, құжат Мемлекет басшысының қол қоюына жолданады.

Аталған құжат Елбасының Жолдауында жүктелген тапсырмаларды іске асыру мақсатында әзірленген. Бұл ретте заң жобасы ең алдымен, төрелік және аралық соттардың қызметін нығайтуға, оның ішінде мемлекеттік соттардың жүктемесін азайтуға бағытталады. Атап айтқанда, заң жобасы арқылы төреліктің және аралық соттың құзыретіне қолданыстағы заңнамада көзделгендей азаматтық-құқықтық шарттардан емес, азаматтық-құқықтық қатынастардан туындайтын дауларды қарау құқығын беру арқылы кеңейту ұсынылады.

Мәжіліс мақұлдаған құжатқа Сенат бірқатар түзету ұсынған болатын. Оның біразымен төменгі палата депутаттарының келіспеуінен қос палата арасында келісім комиссиясы құрылған еді. Талқылау барысында депутаттар комиссия ұсыныстарын қолдап, құжатты қабылдады.