Тоқаев Түркиядағы зілзалаға қатысты: Құтқарушыларды жіберіп, апат салдарын жоюға атсалысамыз

АНКАРА. ҚазАқпарат – Қазақстан Түркияға құтқарушыларды жіберіп, апат салдарын жоюға белсене атсалысады. Бұл туралы ҚР Президенті Қасым-Жомарт Тоқаев бүгін Анкарада өтіп жатқан Түркі мемлекеттері ұйымының «Апат және төтенше жағдайлар менеджменті, гуманитарлық көмек» атты кезектен тыс саммитінде айтты, деп хабарлайды ҚазАқпарат.

«Бүгінгі басқосудың «Апат және төтенше жағдайлар менеджменті, гуманитарлық көмек» деген тақырыпта өтуі бекер емес. Қазір жер жүзінде табиғи және техногендік апаттар көбейіп жатыр. Бұл жағдай өте өзекті халықаралық мәселенің біріне айналды.

Осындай күрделі кезеңде Қазақстан гуманитарлық шаралардан шет қалған емес. Еліміз табиғи апаттан зардап шеккен елдерге үнемі қолдау көрсетеді», - деді Президент.

Сондай-ақ Қ.Тоқаев қазақстандық құтқарушылар Түркия еліне зілзала салдарын жоюға көмектесетінін атап өтті.

«Біз қаржылай және тауар түрінде гуманитарлық көмек берумен ғана шектеліп қалмаймыз. Бұдан бөлек, құтқарушыларды жіберіп, апат салдарын жоюға белсене атсалысамыз.
Жалпы, түркі елдері төтенше жағдай кезінде тиімді әрекет ете білуі керек. Сондай-ақ, Ұйым хатшылығы және мүше мемлекеттер арасындағы байланыстарды нығайта түсу қажет»