Тимофей Скатов Лиссабон турнирінің финалына өте алмады

АСТАНА. ҚазАқпарат - Қазақстандық, әлемнің 233-ракеткасы Тимофей Скатов Лиссабон (Португалия) челленджер турнирінің финалына өте алмады, деп хабарлайды ҚазАқпарат тілшісі.

Қазақстандық теннисші жартылай финалда әлемнің 137-інші, осы жарыстың бесінші ракеткасы, италиялық Марко Чеккинатомен шеберлік байқасты.

Т.Скатов тәжірибелі қарсыласына қатты қарсылық көрсетіп, 5:7, 6:7 (2:7) есебімен жол берді.

Тартысты матч екі сағатқа жуық уақытқа созылды.

Т.Скатовтың Лиссабонда жартылай финалға дейін жетуінің өзін табыс деп есептеуге болады.

Еске сала кетейік, бұдан бұрын теннисші Дмитрий Попконың Аргентинадағы жарыстың жартылай финалына өткенін , елордада Astana Open ATP 500 турнирінің жеребесі тартылғанын жазған болатынбыз.

Сондай-ақ Астанада Александр Недовесов әлемнің 69-ракеткасын жеңді .