Терроризмге осал білім беру нысандарының саны 10 мыңға дейін артты
«Білім беру ұйымдардағы балалардың қауіпсіздігі – болашағымыздың кепілі. Бұл барлық органдардың – басты міндеті. Сондықтан, бұл мәселе – Ішкі істер министрлігінің ерекше бақылауында. Бұрын терроризмге осал объектілер қатарына 200 адамнан тұратын оқу орындары кіретін. 2021 жылы бұл өлшем – 100 оқушыға дейін өзгертілді. Нәтижесінде, мұндай білім беру объектілері 6,5 мыңнан 10 мыңға дейін өсті», - деді ол.
Осы ретте министр Терроризмге қарсы қорғау жөніндегі нұсқаулық бекітілгенін атап өтті.
«Енді адам саны 300-ге дейінгі мекемелерде бейнебақылау мен жариялау жүйелері болу керек. Ал, 700 адамға дейінгі объектілер бейнекамераларды Жедел басқару орталықтарына қосып, дабыл түймелерін орнатуы тиіс. Адам саны 700-ден асса, бұл ұйымдарда және облыстық орталықтағы мектептерде турникеттер және лицензиясы бар күзетпен жасақталған келісімшарт болуы қажет. Қазіргі уақытта, осы талаптарға сәйкес, әкімдіктер білім беру ұйымдарының тізімін жаңартып жатыр», - деді Марат Ахметжанов.