Теннистен ӘЧ: Іріктеу турнирінде Қазақстан жасөспірімдер құрамасының қарсыластары анықталды

АСТАНА. ҚазАқпарат - Шымкент қаласында 16 жасқа дейінгілер арасында теннистен әлем чемпионаты Азия - Тынық мұхит аймағы бойынша іріктеу кезеңінің жеребесі тартылды, деп хабарлайды ҚазАқпарат тілшісі.

Қазақстан теннис федерациясынан мәлім еткеніндей, бозбалалар арасында 7-13 мамыр аралығында өтетін іріктеу сайысына 16 команда қатысады.

Қазақстандықтар D тобында Тайбэй, Өзбекстан және Жаңа Зеландия құрамаларымен ойнайды. 8 мамыр күні Сергей Квактың шәкірттері Жаңа Зеландиямен сынға түседі.

Қазақстан намысын мына спортшылар қорғайды: Әмір Омарханов (Қарағанды), Заңғар Нұрланұлы (Түркістан), Дамир Жалғасбай (Алматы).

Команда капитаны: Сергей Квак.

Еске сала кетейік, бұдан бұрын Қазақстан жасөспірімдерінің тарихи нәтижеге қол жеткізгенін жазған болатынбыз.

Сондай-ақ Қазақстан жасөспірімдер құрамасының капитаны Ярослава Шведова шәкірттерімен мақтанатынын жеткізді.