Теннисші Елена Рыбакина Хобарт турнирінің ширек финалына шықты

НҰР-СҰЛТАН. ҚазАқпарат - Қазақстанның бірінші, әлемнің 30-ракеткасы Елена Рыбакина Хобарт (Аустралия) турнирінің ширек финалына шықты, деп хабарлайды ҚазАқпарат тілшісі.

Осы жарыстың 3-ракеткасы болып тіркелген 20 жастағы қазақстандық теннисші екінші айналымда рейтингте 60-сатыда тұрған франциялық Ализе Корнемен кездесті.

А.Корне Е.Рыбакинадан он жастай үлкендігі бар тәжірибелі спортшы еді.

Бірінші партияда есеп 5:5 болған мезетте қазақстандық теннисші брейк жасай білді. Сосын сетке доп бергенде, мүмкіндігін мүлт жіберген жоқ - 7:5.

Екінші сетте де ол 3:1 есебімен алға шықты. Ақыры матчты тағы бір брейкпен түйіндеді - 6:3.

Бәсеке 1 сағат 35 минутқа созылды.

Е.Рыбакина жартылай финалға шығу үшін рейтингте 129-орында тұрған аустралиялық Лизетт Кабрерамен таласады.

Еске сала кетейік, бұдан бұрын Е.Рыбакинаның Хобарт турнирін жеңіспен бастағанын жазған болатынбыз.