Теннисші Елена Рыбакина Бастад турнирін жеңіспен бастады
Осы жарыстың жетінші, әлемнің 109-ракеткасы, 20 жасар Е.Рыбакина алғашқы айналымда дүниежүзілік рейтингте 368-орында тұрған даниялық Клара Таусонмен кездесті. Бірінші партияда есеп 4:4 болған мезетте қазақстандық теннисші брейк жасай алды. Содан кейін сетке доп бергенде, есесін жіберген жоқ - 6:4. Екінші сетте қатарынан қос брейк жасаған Рыбакина 4:0 есебімен алға шықты. Бірақ Таусон да қалыспай, таразы басын теңестіріп қана қоймай, басып озды - 5:4. Мәселе ақыры тай-брейкте қазақстандық теннисшінің пайдасына шешілді - 7:6 (7:5).
Бәсеке 1 сағат 28 минутқа созылды.
Е.Рыбакина ширек финалға шығу үшін рейтингте 117-орындағы жапониялық Мисаки Доимен таласады. Топырақ төсенішінде өтіп жатқан жарыс 14 шілде күні мәреге жетеді.
Еске сала кетейік, бұдан бұрын М.Кукушкин Уимблдон турнирінің ширек финалына шыға алмаған болатын.