23:28, 30 Қазан 2021 | GMT +6
Теннисші Андрей Голубев ATP 250 турнирінің жұптық сынында финалға шықты
НҰР-СҰЛТАН. ҚазАқпарат – Қазақстандық Андрей Голубев жұптық сында Санкт-Петербург ATP 250 турнирінің жартылай финалына шықты, деп хабарлайды ҚазАқпарат Қазақстан теннис федерациясына сілтеме жасап.
А.Голубев монаколық Юго Ниспен бірге жартылай финалда канадалық Денис Шаповалов – үндістандық Рохан Бопаннамен кездесті.
Алғашқы сетті Андрей мен Юго 4:1 есебімен бастады, алайда Денис пен Рохан екі брейк жасап есепті теңестірді. 10-шы геймде тең тұрғанда Андрей эйс жасап есепті 6:4 қылды.
Төртінші және сегізінші геймде екі сәтті брейк жасаған Канада-Үндістен теннисшілері екінші сетте 6:2 есебімен алға шықты.
Супер тай-брейкте қарсыластар тең келе жатты, алайда Голубев пен Нис белсенді қимылдап 10:4 есебімен жеңіске жетті.
Финалда қазақстандық пен Монако теннисшісі жұптық турнирдің үздіктері - Джэйми Маррей (Ұлыбритания) мен Бруно Соареспен (Бразилия) шеберлік сынасады.