Теннис: Зарина Дияс Люксембургта Токио Олимпиадасының чемпионына жол берді
Дүниежүзілік рейтингте 105-орында тұрған З.Дияс екінші айналымда әлемнің 12-інші, осы жарыстың 1-ракеткасы, Токио Олимпиадасының чемпионы, швейцариялық Белинда Бенчичпен кездесті.
Қарсыластардың бұған дейін үш мәрте жолдары тоқайласып, соның екеуінде швейцариялық теннисші жеңген болатын. Токиода Б.Бенчич сондай-ақ Қазақстанның бірінші ракеткасы Елена Рыбакинаны жартылай финалда қапы қалдырған еді.
Бұл жолы Б.Бенчич бірінші партияда үш брейк жасап, еш жеңістік берген жоқ – 6:1.
Екінші сетте З.Дияс брейк жасап, 2:1 есебімен алға шыққанымен, сол қарқынын жалғастыра алмады. Ақыры Б.Бенчич матчты жеңіспен түйіндей білді – 6:3.
Бір сағатқа созылған бәсекеде теннисшілер бір-бірден эйс жасады. Есесіне швейцариялық спортшы 13 брейк-пойнттың бесеуін пайдаланса, Зарина бір ғана брейкпен шектелді.
Б.Бенчич жүлде қоры 235 мың АҚШ долларынан асатын жарыстың жартылай финалына шығу үшін рейтингте 48-сатыдағы ресейлік Людмила Самсоновамен таласады.
Еске сала кетейік, бұдан бұрын Зарина Диястың Люксембург турнирінің екінші айналымына шыққанын жазған болатынбыз.
Сондай-ақ Юлия Путинцева Словениядағы жарыстың ширек финалына өтті.