Теннис: Юлия Путинцева Страсбург турнирінің екінші айналымына шықты

НҰР-СҰЛТАН. ҚазАқпарат – Қазақстандық, әлемнің 43-ракеткасы Юлия Путинцева Страсбург (Франция) WTA 250 турнирінің екінші айналымына шықты, деп хабарлайды ҚазАқпарат тілшісі.

Ю.Путинцева бастапқы кездесуін әлемнің 59-ракеткасы, швециялық Ребекка Петерсонмен өткізді.

Бірінші партияда қазақстандық теннисші 6:4 есебімен басым түссе, екіншісінде швециялық спортшы есе қайырды – 6:3.

Үшінші, шешуші сетте матч тағдыры тай-брейкте шешіліп, онда Ю.Путинцева жеңісті жұлып алды – 7:6 (7:2).

Қарсыластар 3 сағат 21 минутқа созылған аса тартысты бәсекеде өз есептеріне 9 брейктен жазды.

Ю.Путинцева екінші айналымда ширек финалға шығу үшін әлемнің 53-ракеткасы, швейцариялық Жиль Белен Тайхманмен күш сынасады.

Тағы бір қазақстандық, дүниежүзілік рейтингте 93-орында тұрған Зарина Дияс осы додада әлемнің 57-ракеткасы, франциялық Каролин Гарсияға 5:7, 2:6 есебімен есе жіберді.

Еске сала кетейік, бұдан бұрын Александр Бубликтің әлемдік рейтингіде 37-орынға көтерілгенін жазған болатынбыз.