Теннис: Юлия Путинцева Сербия ашық чемпионатын жеңіспен бастады
Белградтағы WTA 250 турнирінің 2-ракеткасы болып тіркелген қазақстандық теннисші бастапқы кездесуін дүниежүзілік рейтингіде 100-орында тұрған словениялық Кайя Юванмен өткізді.
Бірінші партияда есеп 3:3 болған мезетте Юлия брейк жасап, алға шыққанымен, қатарынан үш геймді қарсыласына беріп қойды - 4:6.
Есесіне екінші сетте 5:0 есебімен алға кетті. Бұдан кейін словениялық спортшы брейк жасағанымен, партия Путинцеваның есебіне жазылды - 6:2.
Үшінші, шешуші партияда есеп 1:1 болғаннан кейін Юлия қарсыласына дес бермеді - 6:1.
Орталық кортта өткен тартысты бәсеке 2 сағат 19 минутқа созылды.
Ю.Путинцева жүлде қоры 235 мың АҚШ долларынан асатын доданың екінші айналымында әлемнің 67-ракеткасы, бельгиялық Элисон Ван Эйтванк немесе рейтингіде 188-сатыдағы хорватиялық Ана Конюхтың біреуімен кортқа шығады.
Еске сала кетейік, бұдан бұрын Александр Бубликтің әлемдік рейтингіде 38-орынға көтерілгенін жазған болатынбыз.