Теннис: Юлия Путинцева Рим турнирінің екінші айналымына шықты

НҰР-СҰЛТАН. ҚазАқпарат - Қазақстандық Юлия Путинцева Рим WTA турнирінің екінші айналымына шықты, деп хабарлайды ҚазАқпарат тілшісі.

Әлемнің 30-шы ракеткасы Ю.Путинцева бастапқы кездесуін рейтингте 49-орында тұрған швециялық Ребекка Петерсонмен өткізді.

Қазақстандық теннисші 6:2, 6:4 есебімен жеңіске жетті.

Біршама тартысты өткен бәсеке 1 сағат 42 минутқа созылды.

Ю.Путинцева екінші айналымда әлемнің 16-ыншы, осы доданың 8-ракеткасы, хорватиялық Петра Мартичпен кездеседі. Осының алдында US Open жарысының төртінші айналымында Юлия Петраны ұтып, ширек финалға шыққан болатын.

Бір қызығы, Қазақстанның бірінші, әлемнің 18-ракеткасы Елена Рыбакина мен Ю.Путинцева келесі қарсыластарын жеңсе, өзара кездеседі.

Е.Рыбакина екінші айналымда рейтингте 47-сатыдағы чехиялық Мария Боузковамен шеберлік байқасады.

Еске сала кетейік, бұдан бұрын Е.Рыбакинаның Рим турнирін жеңіспен бастағанын, ал А.Бубликтің ұтылып қалғанын жазған болатынбыз.