21:46, 15 Қазан 2019 | GMT +6
Теннис: Рыбакина Люксембург турнирінің екінші айналымына шықты
НҰР-СҰЛТАН. ҚазАқпарат – Қазақстандық Елена Рыбакина Люксембург WTA турнирінің екінші айналымына шықты, деп хабарлайды ҚазАқпарат тілшісі.
Әлемнің 43-ракеткасы Е.Рыбакина алғашқы кездесуін дүниежүзілік рейтингте 150-орында тұрған франциялық Хлоэ Пакемен өткізді.
Х.Паке негізгі жарысқа іріктеу сайыстарынан кейін қосылса, қазақстандық теннисші турнирдің 3-ракеткасы болып тіркелген еді.
Бірінші партияда Е.Рыбакина айқын басымдылық көрсетті – 6:2.
Екінші сет тай-брейкке дейін жетіп, онда да қазақстандық спортшы өз мүмкіндігін жіберген жоқ – 7:6 (7:2).
Бәсеке 1 сағат 28 минутқа созылды.
Е.Рыбакина жүлде қоры 226,4 мың АҚШ долларына бағаланған доданың ширек финалына шығу үшін рейтингте 247-сатыдағы чехиялық Дениса Аллертовамен таласады.
Еске сала кетейік, бұдан бұрын М.Кукушкиннің «Кремль кубогын» жеңіспен бастағанын жазған болатынбыз.