Теннис: Рыбакина Хертогенбос турнирінің екінші айналымына шықты

НҰР-СҰЛТАН. ҚазАқпарат - Қазақстандық теннисші Елена Рыбакина Хертогенбос (Нидерланды) турнирінің екінші айналымына шықты, деп хабарлайды ҚазАқпарат тілшісі.

Негізгі турнирге іріктеу сайыстарынан кейін қосылған қазақстандық спортшы алғашқы айналымда америкалық Варвара Лепченкомен күш сынасты.

Жуырда 20-ға толатын Е.Рыбакина бүгін жаңартылған рейтингте 141-ден 134-сатыға көтерілсе, 33 жастағы тәжірибелі В.Лепченко 127-орында еді.

Бірінші партияда қазақстандық теннисші қарсыласын бет қаратқан жоқ - 6:1.

Екінші сетте де басымдығы айқын көрінді - 6:2.

Бәсеке бір сағаттан сәл астам уақытқа созылды.

Е.Рыбакина жүлде қоры 250 мың еуроға бағаланған Хертогенбос турнирінің екінші айналымында әлемнің 55-ракеткасы, бельгиялық Элисон Ван Эйтванк немесе 57-сатыдағы қытайлық Ван Яфаньның біреуімен кездеседі.

Аталмыш жарыс 16 маусым күні мәреге жетеді.

Тағы бір қазақстандық Александр Бублик Штутгартта негізгі турнирге шыға алмады. Ол бүгін іріктеу сайыстарының финалында әлемнің 108-ракеткасы, испаниялық Фелисиано Лопеске 5:7, 4:6 есебімен есе жіберді.

Дүниежүзілік рейтингте Михаил Кукушкин мен А.Бублик өз көрсеткіштерін жақсартып, сәйкесінше 51-ден 47-ге, 91-ден 85-орынға жоғарылады. Александр Недовесов 189-дан 194-ке төмендеді.

Әйелдер арасында «Ролан Гаррос» турнирінің алғашқы айналымында сүрінген Юлия Путинцева 28-ден бірден 43-сатыға сырғыды. Зарина Дияс 99-дан 101-орынға жайғасты.

Еске сала кетейік, бұдан бұрын Е.Рыбакинаның Хертогенбоста негізгі жарысқа жолдама алғанын, ал испаниялық Рафаэль Надальдың «Ролан Гаррос» турнирін 12-мәрте ұтқанын жазған болатынбыз.