Теннис: Недовесов Astana Open турнирінде жеңіліп қалды
Қазақстандық, дүниежүзілік рейтингте 332-орында тұрған Александр Недовесов әлемнің 114-інші, іріктеу сайыстарының 6-ракеткасы, босниялық Дамир Джумхурмен кездесті.
Бірінші партияда қазақстандық теннисші брейкпен алға шықты – 3:0. Тағы бір брейк – 5:1. Содан кейін өз геймін де берген жоқ – 6:1.
Екінші сетті де А.Недовесов брейкпен бастағанымен, қарсыласы таразы басын теңестіріп үлгерді – 2:2. Есеп 3:3 болған мезетте қарсыластар брейкпен алмасты – 4:4. Босниялық теннисші партияны брейкпен түйіндеді – 7:5.
Үшінші, шешуші партияда Д.Джумхур брейкпен алға кетті – 3:1. Сосын матчты тағы бір брейкпен тәмамдады – 6:2.
Бәсеке 1 сағат 43 минутқа созылды.
Босниялық спортшы іріктеу сайыстарының финалында әлемнің 95-ракеткасы, германиялық Янник Ханфманн немесе рейтингте 200-сатыдағы ұлыбританиялық Лиам Бродидің біреуімен күш сынасады.
Еске сала кетейік, қазақстандық теннисшілердің Astana Open турниріндегі қарсыластары белгілі болғанын жазған едік.