Теннис: Михаил Кукушкин Монте-Карло турнирін сәтті бастады

НҰР-СҰЛТАН. ҚазАқпарат - Қазақстандық теннисші Михаил Кукушкин Монте-Карло (Монако) турнирінің алғашқы айналымында франциялық Жереми Шардимен кездесті, деп хабарлайды ҚазАқпарат тілшісі.

Қазақстандық спортшы бүгін жаңартылған дүниежүзілік рейтингте 44-тен 42-ге, ал қарсыласы 42-ден 41-сатыға көтерілген еді.

Олардың екеуі де 1987 жылы дүниеге келген тәжірибелі теннисшілер болатын.

Бірінші партияда брейк жасаған Михаил Кукушкин 4:3 есебімен алға шықты. Сосын мұны тағы бір брейкпен түйіндеді - 6:3.

Екінші сетте есеп 5:4 болған мезетте қазақстандық спортшы брейк жасап, матчты аяқтай білді - 6:4.

Бәсеке 1 сағат 23 минутқа созылды.

М.Кукушкин екінші айналымда әлемнің 8-ракеткасы, грекиялық Стефанос Циципаспен күш сынасады.

Жүлде қоры 5,5 млн еуродан асатын Монте-Карлодағы мастерс турнирі 21 сәуірде мәреге жетеді.

Еске сала кетейік, бұдан бұрын М.Кукушкиннің Монте-Карлодағы қарсыласы анықталғанын, тағы бір қазақстандық Дмитрий Попконың АҚШ-тағы турнирдің жеңімпазы атанғанын жазған болатынбыз. Ал әйелдер арасында қазақстандық Галина Воскобоева ресейлік Вероника Кудерметовамен Лугано турнирінің финалында ғана есе жіберді.