Теннис: Кукушкиннің Лион турниріндегі қарсыласы белгілі болды

АСТАНА. ҚазАқпарат - Қазақстандық Михаил Кукушкиннің Францияда өтіп жатқан Лион турниріндегі қарсыласы белгілі болды, деп хабарлайды ҚазАқпарат тілшісі.

Дүниежүзілік рейтингте 91-інші орында тұрған қазақстандық теннисші ширек финалда әлемнің 75-інші ракеткасы, Франция елінің өкілі Жиль Симонмен кездеседі. Екінші айналымда Ж.Симон бельгиялық, әлемнің 351-інші ракеткасы Йорес Де Лорені 7:6, 6:2 есебімен тізе бүктірді.
Сол секілді бүгін Францияның тағы бір қаласы Страсбургте Қазақстанның бірінші, әлемнің 53-інші ракеткасы Зарина Дияс жартылай финалға шығу үшін дүниежүзілік рейтингте 31-інші сатыда тұрған ресейлік Анастасия Павлюченковамен таласады.

Тағы бір қазақстандық теннисші, әлемнің 93-інші ракеткасы Юлия Путинцева Нюрнберг турнирінің екінші айналымында рейтингте 105-інші орында тұрған америкалық Элисон Рискемен шеберлік байқасады. Егер оны жеңсе, ширек финалда әлемнің 45-інші ракеткасы, румыниялық Сорана Кырстямен жолығады.

Бұл үш жарыс та Франция ашық чемпионаты - Ролан Гаррос турнирі алдындағы соңғы дайындық сыны болып есептеледі. Қазіргі кезде бұл доданың іріктеу сайыстары өтуде.

Еске сала кетейік, бұдан бұрын Михаил Кукушкиннің Лион турнирінің ширек финалына шыққанын жазған болатынбыз.