Теннис: Кукушкин US Open турнирінің іріктеу сайысын жеңіспен бастады

НҰР-СҰЛТАН. ҚазАқпарат – Қазақстандық, әлемнің 129-ракеткасы Михаил Кукушкин US Open турнирінің іріктеу сайысын жеңіспен бастады, деп хабарлайды ҚазАқпарат тілшісі.

Іріктеу сайыстарының 13-ракеткасы болып тіркелген М.Кукушкин бастапқы кездесуін дүниежүзілік рейтингте 193-орындағы франциялық Матиас Буркпен өткізді.

Тартысты матчта қазақстандық теннисші 4:6, 6:3, 7:6 (7:2) есебімен жеңіске жетті.

2 сағат 40 минутқа созылған бәсекеде М.Кукушкин 8 эйс жасап, 10 брейк-пойнттың екеуін пайдаланды. Қарсыласы 11 эйс, 2 брейкке (6 брейк-пойнт) қол жеткізді.

М.Кукушкин іріктеу сайыстарының жартылай финалында әлемнің 168-ракеткасы, тайбэйлік Джейсон Джангпен шеберлік байқасады.

Тағы бір қазақстандық, рейтингте 182-сатыда тұрған Дмитрий Попко өзінен үш саты жоғары тұрған словениялық Блаж Роладан 2:6, 5:7 есебімен ұтылып қалды.

Еске сала кетейік, бұдан бұрын қазақстандық теннисшілердің US Open турнирінің іріктеу сайысында бақ сынайтынын жазған болатынбыз.