20:55, 19 Шілде 2019 | GMT +6
Теннис: Елена Рыбакина Бухарест турнирінің жартылай финалына шықты
НҰР-СҰЛТАН. ҚазАқпарат – Қазақстандық Елена Рыбакина Бухарест WTA турнирінің жартылай финалына өтті, деп хабарлайды ҚазАқпарат тілшісі.
Дүниежүзілік рейтингте 106-орында тұрған Е.Рыбакина ширек финалда осы турнирдің екінші, әлемнің 54-ракеткасы, словакиялық Виктория Кузьмовамен күш сынасты.
Бірінші партия тартысты өрбіп, тай-брейкте қазақстандық теннисші басым түсті – 7:6 (7:4).
Екінші сетте Рыбакина есесін жібермеді – 6:3.
Бәсеке сағат жарымға созылды.
Е.Рыбакина финалға шығу үшін әлемнің 132-ракеткасы, чехиялық Барбора Крейчикова немесе рейтингте 211-сатыдағы италиялық Мартина Ди Джузеппенің біреуімен таласады.
Еске сала кетейік, бұдан бұрын Андрей Голубев пен Александр Недовесовтің жұптық сында Нұр-Сұлтан жарысының жартылай финалына шыққанын және бүгін финалына өткенін жазған болатынбыз.