Теннис: Бублик Франциядағы жарыстың жартылай финалына шықты
Дүниежүзілік рейтингте 153-орында тұрған қазақстандық спортшы ширек финалда корт иесі, әлемнің 222-ракеткасы Максим Жанвьемен күш сынасты.
А.Бублик бірінші партияда үш бірдей брейк жасап, айқын басымдылықпен ұтты - 6:1.
Екінші сет әлдеқайда тартысты өрбіді. Есеп 6:5 болып тұрған мезетте А.Бублик қос бірдей матчболды пайдалана алмады. Дегенмен үшіншісін мүлт жіберген жоқ - 7:5.
Бәсеке 1 сағат 15 минутқа созылды.
Қазақстандық теннисші жартылай финалда тағы бір франциялық, осы турнирдің бірінші, әлемнің 125-ракеткасы Грегуар Баррер немесе рейтингте 313-сатыдағы ресейлік Роман Сафиуллиннің бірімен кездеседі.
Еске сала кетейік, бұдан бұрын Зарина Диястың Индиан-Уэллстегі жарысты сәтті бастап, бүгін ширек финалға шыққанын жазған болатынбыз.
Зарина ширек финалда америкалық, әлемдік рейтингте 179-сатыда тұрған Франческа Ди Лоренцомен шеберлік байқасады.
Сондай-ақ Александр Бублик те Франциядағы турнирдің ширек финалына жолдама алған еді.