Теннис: Александр Бублик Чэнду турнирінің жартылай финалына шықты
Дүниежүзілік рейтингте 71-орында тұрған А.Бублик ширек финалда осы жарыстың төртінші, әлемнің 26-ракеткасы, болгариялық Григор Димитровпен күш сынасты.
Қазақстандық теннисші биыл 22-ге толса, тәжірибелі қарсыласы 28-де еді.
Бірінші партияда Г.Димитров басымдық танытты - 7:5.
Екінші сетте тай-брейкте Бубликтің бағы жанды - 7:6 (11:9).
Үшінші, шешуші партияда брейк жасаған Бублик алға кетті - 3:0. Дегенмен қарсыласы да қарап қалмай, таразы басын теңестірді. Ақыры тай-брейкке тірелген матчта қазақстандық теннисші жеңіске жетті - 7:6 (7:3).
Тартысты бәсеке 2 сағат 30 минутқа созылды.
А.Бублик жүлде қоры 1,2 млн АҚШ долларынан асатын турнирдің финалына шығу үшін әлемнің 62-ракеткасы, португалиялық Жоау Соуза немесе рейтингте 111-орындағы оңтүстікафрикалық Ллойд Джордж Харристің біреуімен таласады.
Еске сала кетейік, бұдан бұрын Зарина Дияс Бейжіңнің іріктеу сайысын сәтті бастады.