Теңіздегі жағдай: Араб компаниясының басшысы қазақстандықтардан кешірім сұрады
Кауаш Хишамның әлеуметтік желілерде жарияланған бейне үндеуінде айтылғандай, ол Теңіз кентіндегі ССЕР компаниясының қызметкерлері арасындағы жанжал туралы білген бойда бірден Атырау облысына аттанған.
«Қайырлы күн! Мен Эли Даудтың іс-әрекеті үшін барлығыңыздан кешірім сұрағым келеді. ССЕР басшылығы мен қызметкерлерінің атынан бұл компания саясатына, құндылықтары мен қағидаттарына сәйкес келмейтін келеңсіз оқиға болғанын айтқым келеді. Аталмыш жағдайдан кейін онымен арадағы келісімшарт бұзылып, ол жұмыстан босатылды. Біз осы жағдайға қатысты толық ішкі тергеу жұмыстарын жүргізіп, қажетті шараларды қабылдаймыз. Қолымды жүрегіме қойып, компанияның бауырлас қазақтарға ерекше құрметпен қарайтынын айтқым келеді. Мен болған жайт үшін тағы да кешірім сұраймын. Осы оқиға туралы естіген бойда жағдайды реттеу үшін дереу Атырауға ұшып шықтым. Бүгінгі таңда Теңіздегі жағдай тұрақты, өлім-жітім, ауыр дене жарақаттары болған жоқ», - деді Кауаш Хишам өзінің бейне үндеуінде.
Бұдан бұрын хабарланғандай, 29 маусым күні «Теңіз» вахта қалашығында (Жылыой ауданы Құлсары қаласынан 120 км, Атырау қаласынан 340 км) «Сohsolited Contracting Endihering and Prourement S.A.L Offshore (CСЕР)» компаниясының жұмысшылары жұмыс учаскесіне жиналып, Ливия азаматы Eli Daoud-тің жақында WhatsАpp желісінің профиліне орналастырған фотосуретіне наразылық білдірген болатын.