Теңіз кенішінің 15 жұмысшысынан коронавирус анықталды
2020 жылғы 2 мамыр 15:35

Теңіз кенішінің 15 жұмысшысынан коронавирус анықталды

АТЫРАУ. ҚазАқпарат – Бүгін Атырау облысындағы Теңіз кенішінің 15 жұмысшысынан коронавирус табылды, деп хабарлайды ҚазАқпарат.

Төтенше жағдай режимін қамтамасыз ету жөніндегі өңірлік жедел штабтың хабарлауынша, 2 мамырда таңертең Жылыой ауданында орналасқан кен орнының 15 жұмысшысынан қауіпті індеттің белгісі анықталған.

«Науқастардың арасында 10 ер адам (33, 43, 28, 26, 53, 27, 26, 50, 30, 45 жастағы) мен 49, 42, 30, 48, 41 жастағы 5 әйел бар. Олар Теңіз кенішінде мердігер және қосалқы мердігер компанияларында жұмыс істеген. Бәрі де осы кезге дейін коронавирус жұқтырған науқастармен байланыс жасағаны үшін карантиндік стационарда болды. Олардан зертханалық анализ алынып, ПТР тестілеудің диагностикалық зерттеуі нәтижесінде коронавирус инфекциясы анықталды», - деп хабарлады өңірлік жедел штабтан.

Қазір науқастардың жағдайы қанағаттанарлық. Бекітілген хаттамаға сәйкес, ем қабылдап жатыр. Олармен байланыста болғандар анықталып, медициналық бақылауға алынды. Қауіпті індет ошақтарында дезинфекциялық жұмыс жүргізілуде.

Бүгін Атырау облысында коронавирус жұқтырғандар саны 161-ге жетті. Оның 97-сі Теңіз кен орнының жұмысшысы.

Еске сала кетелік, 16 сәуірден бастап Теңіз кенішінен шұғыл емес персоналды шығару басталған болатын. 30 сәуірде Теңіз кенішінде коронавирусқа шалдыққандармен байланыста болған​ 1,5 мыңнан астам жұмысшы анықталған еді.


Автор:
Тілші

Jańalyqtar

MURAǴAT