12:25, 22 Мамыр 2018 | GMT +6
Теміртауда дүкенді тонаған төрт күдіктіге үкім шықты
ҚАРАҒАНДЫ. ҚазАқпарат - Теміртау қалалық сотында азық-түлік дүкенін тонаған төрт ер адамға қатысты үкім шығарылды, деп хабарлайды ҚазАқпарат тілшісі.
«Төрт күдіктіге ҚР ҚК-нің 191-бабы «Ұрлық жасау» бойынша 5 жылға бас бостандықтарынан шектеу үкімі шықты. Олар пробациялық бақылауға алынды», - деп хабарлады Теміртау қалалық сотының баспасөз қызметінен.
Өткен күзде бетперде киген төрт ер адам Теміртау қаласындағы 8-шағынаудандағы дүкенге басып кірген. Қаскүнемдер қаруға ұқсайтын затпен қорқытып, кассадағы барлық ақшаны алып кеткен.
Оларды Ішкі істер департаментінің қарақшылық шабуыл ісін ашу бойынша арнайы тобы ұстаған. Екі күдіктінің жасы 19-да, екеуі - 21-де.
Алғашында қылмыстық іс «Тонау» бабы бойынша қозғалды. Кейін тергеу барысында «Ұрлық жасау» бабына ауыстырылды.