16:19, 15 Мамыр 2022 | GMT +6
Текеліде лай көшкіні жүріп 5 жасар бала жоғалып кетті
ТЕКЕЛІ. ҚазАқпарат - Текелі қаласында лай көшкіні жүріп, бес жастағы бала жоғалып кетті, деп хабарлайды ҚазАқпарат тілшісі.
«Оқиға бүгін болған. Сағат 12:00 шамасында төтенше жағдайлар қызметіне лай көшкіні жүргендігі жөнінде хабарлама түсті. Салдарынан Қонаев көшесінің бойындағы бір үй бүлінген, төрт үйдің ауласын батпақ басқан. Қазір бес жастағы қыз бала жоғалып кетті, іздестіру жұмыстары жүріп жатыр»,- деді Алматы облыстық Төтенше жағдайлар департаментінің баспасөз қызметінің өкілі Азамат Жұртбаев.
Оқиға орнында жүздеген адам учаскелерге бөлініп, арнайы мамандар мен құтқарушылар жұмыс істеуде. Олар кинологиялық қызметті жұмылдыра отырып іздеуді жалғастыруда.
Ведомствоның өкілі, әзірге батпақ жүруіне жауыннан өзге құбырдың да жарылуы себеп болуы мүмкін екенін айтты. Әзірге бұл болжам ғана.