АСТАНА. ҚазАқпарат – Tartyl Fest республикалық турнирінде 30 жастан жоғары 80 келіге дейінгі салмақ дәрежесінде Евгений Нам жеңіске жетті, деп хабарлайды ҚазАқпарат тілшісі.
Тараз қаласынан келген қатысушы финалда өзінің іріктеудегі рекордын жаңартып, турникке 52 рет тартылды. Бұл – әзірге сайыстың ең үздік көрсеткіші. 33 жастағы Евгений Нам өткен жылы Қарағанды қаласында өткен іріктеу кезеңінде турникке 50 рет тартылып, жарыстың рекордын орнатқан болатын.
Бұған дейін хабарлағанымыздай, қазір елордадағы Конгресс орталықта Tartyl Fest республикалық турнирінің гранд-финалы өтіп жатыр. Тартысты бәсекені «Jibek Joly» телеарнасының тікелей эфирі мен youtube арнасынан көруге болады.