Tartyl Fest: Ілияс Мұқышев 18 жастағылар арасында 70 келі салмақ бойынша жеңімпаз атанды
«Мен Street Workout және самбо спортымен айналысамын. Елімізде басқа мемлекеттерде жоқ осындай керемет жоба қолға алынғанына қуаныштымын. Гранд-финалда жеңіске жеткенімен қуанып тұрмын және жақындарыма көп рахмет айтқым келеді. Ең бастысы, ата-анам қуанса болды», - деді Ілияс Мұқышев өз нәтижесін білгеннен кейін.
Спортшы алдағы жоспары туралы пікір білдірді.
«Менің мақсатым – спорттың Street Workout түрін насихаттау. Өз елімнің атынан әлемдік деңгейдегі турнирге қатысқым келеді», - деді Ілияс Мұқышев.
Бұған дейін хабарлағанымыздай, қазір елордадағы Конгресс орталықта Tartyl Fest республикалық турнирінің гранд-финалы өтіп жатыр.
Еске салсақ, ҚР Президенті жанындағы «DARA» таланттарды қолдау қорының бастамасымен ұйымдастырылған турнирдің ақтық сынына өңірлік іріктеу жарыстарында үздік нәтиже көрсеткен 170 спортшы қатысады. Қатысушылардың жасы – 11-51 жас аралығында.
Турникке тартылу жарысы былтыр Қазақстанның 20 қаласында өтті. Онда 7 мыңнан астам қазақстандық 9 салмақ дәрежесінде сайысқа түсіп, 33 жастағы тараздық Евгений Нам 50 рет көрсеткішпен турнир рекордын орнатқан.
EXPO аумағындағы Конгресс орталықта өтіп жатқан гранд-финалдан «Jibek Joly» телеарнасы тікелей көрсетілім таратады.
Гранд-финалдың жалпы жүлде қоры – 54 млн теңге. Өз салмақ дәрежесі бойынша 1-орын алған жеңімпаздарға 3 млн теңге, 2-орын алғандарға 2 млн теңге, 3-орын иеленгендерге 1 млн теңге сыйақы беріледі.
Бұл гранд-финалда чемпион атанғандар Street Workout бойынша әлем чемпионатында Қазақстан атынан сайысқа түсе алады.