Таразға бөлінген қайтарымсыз грант саны - 45, таласып жатқандар 700-ден көп
«Тараз қаласы әкімдігінің халықты жұмыспен қамту орталығы» кәсіпкерлікті қолдау бөлімінің басшысы Динара Баянованың айтуынша, жобаның бірінші кезеңі бойынша жаңа бизнес идеяларды іске асыруға ниетті қала тұрғындарының саны 728-ге жеткен. Бірақ, 400 айлық есептік көрсеткіш, яғни 1 миллион 380 мың теңгенің қайтарымсыз грантына берілген лимит саны – 45.
«Өтінімдердің 278-інің бизнес жобасы мал шаруашылығы, 170-і кондитерлік өнімдер, 80-і тігін ісін, 60-ы сұлулық салонын, 45-і компьютерлік қызмет көрсету орталықтарын ашуға құрылса, 57-сі емшара кабинеттерін ашу, 40-ы өзге қызмет түрлерін таңдаған. 9-20 наурыз аралығында өткен іріктеу кезеңінде 728 үміткердің 638-і келіп өздерінің бизнес жобаларын қорғады. 90-ы белгісіз себептермен комиссия отырысына келмеді», – дейді бөлім басшысы.
Айта кетейік, бұған дейін Жамбыл облысында 700 млн доллардың меморандумдарына қол қойылып, 20-ға жуық келіссөз жүргізілді деп хабарлаған болатынбыз.