Тараздың өз «жасыл белдеуі» болады

ТАРАЗ. ҚазАқпарат - Жамбыл облысы әкімдігінің кезекті отырысында облыс орталығының айналасындағы аумақты абаттандыру жобалары талқыланды. Бұл туралы аймақ басшысының баспасөз қызметінен мәлім етті, деп хабарлайды ҚазАқпарат тілшісі.

Бетпақ дала табиғи алқабында орналасқан Тараз қаласын Талас Алатауы, Қаратау таулары мен Тектұрмас биігі қоршап тұр. Тараздың айналасында демалыс орындарын ашуға қолайлы көптеген көрікті жерлер, тау шатқалдары, өзен-көлдер болуына қарамастан, қала тұрғындары демалатын жер таппай қиналады.

Отырыс барысында жауапты мамандар Тараз қаласы бас жоспарын іске асыру кезеңдері туралы айтты. Бірінші кезеңде жаңа бас жоспар жасалып, қала маңындағы аумақтарды абаттандыру жобасы әзірленеді. Мамандар Байзақ және Жамбыл аудандары аумақтарының облыс орталығына жапсарлас жатқан бөліктерін қосуды ұсынды.

Өңір басшысы Асқар Мырзахметов әзірге жаңа бас жоспарға қажеттілік жоқтығын айтты. Бірақ заңның талабы бойынша, кезекте тұрған азаматтарға облыстың кез келген нүктесінен 0,01 гектар жерді беруге болатынын білдірді.

Сондай-ақ алдағы уақытта аталған аудандардың аумақтарында түрліше демалыс орындарын ашу жоспарланған.

Облыс әкімі Асқар Мырзахметов қала маңындағы құрылысқа жарамсыз жерлерге ағаш отырғызу қажеттігін айтып, «жасыл белдеу» құруды  тапсырды.

Бұдан тыс, өңір басшысы Талас өзенінің Тараз қаласының маңындағы жағалауларын тиімдірек пайдалану қажеттігін атап көрсетті.

Айта кетейік, Тараз қаласы бүгінде батыс және солтүстік-батыс бағыттарда дамып келеді. Бұған - биылдың өзінде 14 және 15-шағын аудандардың салынып жатқаны айғақ.