Тараздық полиция департаментіне шабуыл жасады деген күдікпен ұсталды
Бұл туралы ол Орталық коммуникациялар қызметінде өткен брифингіде мәлім етті.
«Бүгінгі таңда қабылданған шаралар нәтижесінде еліміздің полицейлері 1 430 бірлік қару мен 35 мыңнан астам оқ-дәріні тауып, тәркіледі.
Тәркіленгендердің ішінде 323 тапанша, 148 автомат, 195 травматикалық тапанша, 9 гранатомет, 69 бірлік арнайы қару, 8 мылтық, 6 пулемет және басқа қару түрлері бар.
Ағымдағы жылдың 29 наурызында Жамбыл облысы полиция департаментінің ғимаратына шабуыл жасады деген күдікпен Тараз қаласының тұрғыны ұсталды, ол ағымдағы жылдың 6 қаңтарына қараған түні әкімшілік ғимараттың қоймасынан оқ қорапшасы бар 4 «макаров» тапаншасын, 7,62 мм калибрлі 120 патронды және 12 калибрлі 11 аңшылық патронды ұрлап кеткен.
Ұрланған қару күдіктінің тұрғылықты жері бойынша жеке үйдің ауласында жабдықталған қоймадан алынды», - деді ІІМ өкілі.
Айтуынша, Тараз қаласының тағы бір күдікті тұрғыны Жамбыл облысы полиция департаментінен өзі ұрлаған қаруды сақтаған екі қойманы көрсетті.
«Тараз қаласының шетіндегі тінту іс-шаралары барысында далада көмулі екі қорап оқсауыты толық «Калашников» автоматы табылды. Осы облыстың Байзақов ауданындағы екінші қоймадан төрт оқсауыты бар «Макаров» тапаншасы, екі травматикалық тапанша, 7,62 мм калибрлі 120 патрон табылып, тәркіленді.
Биылғы 19 наурызда Алматы қаласы полиция департаменті Криминалдық полиция басқармасының қызметкерлері Алматы қаласындағы «Камерад» дүкеніне шабуыл жасап, қару ұрлаған екі қала тұрғынын анықтады. Олар өздері жалға алынған үйдің ауласында өздері ұрлаған патроны бар 12 калибрлі төрт «Сайга» аңшылық мылтығын және 12 калибрлі «Сибергун» бір аңшылық мылтығын, сондай-ақ екі бронежилетті жасырып сақтаған», - деді Санжар Әділов.
Бас прокуратура дерегі бойынша, қаңтар оқиғасы кезінде Алматы қаласындағы жаппай тәртіпсіздіктерге 12 ұйымдасқан қылмыстық топ қатысқан.