Таразда салмағы 5 келі алып бала дүниеге келді
Денсаулық сақтау басқармасы баспасөз қызметінің мәліметінше, 19 сәуірде Жамбыл облыстық көпбейінді ауруханасының перинаталды орталығына жүкті әйел түскен.
«Әйел қатты толғатып келді. Дәрігерлер оны қарап шыққан соң бірден консилиум шақырды, өйткені бұл - ерекше жағдай еді, - дейді басқарманың баспасөз қызметі. – Шақалақтың ірілігімен қоса басқа да проблема болды - нәресте басымен емес, бөксесімен келіп тұрған болатын. Сондықтан қалай босандыру мәселесін шұғыл шешу керек болды».
Мамандардың айтуынша, жамбаспен келген баланы әдетте табиғи жолмен дүниеге әкелуге толық мүмкіндік бар, ондай деректер аз емес.
Алайда дәл осы жағдайда нәрестенің ірі болуы, сондай-ақ ананың метаболикалық синдромы оған кедергі жасады. Сондықтан шұғыл түрде кесір тілігін жасау жөнінде шешім қабылданды.
Отаны клиниканың ұйымдастыру-әдістеме бөлімінің басшысы Бағдат Нұрмахан және қабылдау бөлімінің меңгерушісі Ақмарал Тоқбергенова жасады.
Операция сәтті өтті, салмағы бес келі және бойы 62 сантиметр болатын қыз дүниеге келді.
«Ана мен баланың жағдайы жақсы, үйге шығуға дайындалып жатыр. Салмағы бес келіден асатын нәрестелерді алып бала деп атайды. Өйткені сәби 5-6 келі салмаққа әдетте алты айға толғанда жетеді. Тараз перинаталды орталығында ірі бала соңғы мәрте 2017 жылы дүниеге келген. Сол жолы 30 жастағы Алена Премушко атты келіншек 6 килограмм 265 грамм және бойы 67 сантиметр болатын «рекордшы « қызды босанды. Бұл - оның үшінші баласы еді, нәресте айы-күніне толық жетіп табиғи жолмен өмір есігін ашты», - дейді облыстық денсаулық сақтау басқармасының бастығы Әсет Қалиев.
Дәрігерлердің айтуынша, соңғы онжылдықтарда жедел биологиялық даму жүріп жатыр, сондықтан нәрестелер жиі бес және алты килограмм болып туады.