Таразда 555 бірыңғай үлгідегі коттедж үйлер салынады

ТАРАЗ. ҚазАқпарат – Тараз қаласының әкімі Қайрат Әскербекұлы «Өңірлік коммуникациялар қызметінің» ақпарат алаңында өткен брифингте мемлекеттік тұрғын үй бағдарламалары туралы баяндап, журналистердің сұрақтарына жауап берді, деп хабарлайды ҚазАқпарат тілшісі.

Қала басшысы Тараз қаласындағы Сүлейменов көшесінің соңындағы алқапта 555 жер телімінде жер телімдері белгіленгендігін айтып, онда жеке инвесторлар тарапынан несиеге берілетін бірыңғай сәулеттік стильдегі коттедждік үйлердің құрылыстары жүргізілетіндігін жеткізді. Бүгінде 255 жер телімі бойынша 4 мердігермен келісімшарт жсалған. Атап айтсақ, «КСС контракшин» ЖШС – 5, «РемСтрой СС» ЖШС – 150, «Сырым Білеке» ЖШС – 50, «Дәмдес» ЖШС – 50 коттедж салуы көзделуде.

«Қазіргі таңда 14 үйдің құрылыстары аяқталып, 4 үйге әлеуетті сатып алушы анықталды. Бұдан бөлек, қосымша 26 үйдің құрылысы жүргізілуде. Осы үйлерді сату мақсатында 2006 жылы жер учаскесін алуға кезекте тұрған азаматтарға түсіндіру жұмыстары жүргізілді. Бұл бағыттағы жұмыстар кезең – кезеңімен өз жалғасын табатын болады»,-деді Қайрат Досаев.