Таразда 456 нысан «Ashyq» қосымшасымен жұмыс істейді
Бұл туралы Тараз қаласы әкімінің орынбасары Алмас Сәдубаев айтты. Оның сөзіне қарағанда, жыл басынан бері мұнда қауіпті індет пен пневманияға шалдыққан 6 730 науқас тіркелген. Өткен тәуліктің өзінде 186 тұрғын коронавирусқа шалдыққан. Ал былтыр 2 260 адам
вирус жұқтырса, 250 тұрғыннан өкпе дерті анықталған.
Шілде айының өзінде Тараз қаласында 1 814 азамат сырқаттанса, 265 адам пневманиямен ауырған. Сондықтан да Тараз қаласы әкімдігі тарапынан құрылған мониторингтік топ облыс орталығында орналасқан кәсіпкерлік субъектілеріне күнделікті рейдтік жұмыстар жүргізіп, жіті тексеруде.
А. Сәдубаев соңғы үш күнде жүргізілген осындай рейдтік шаралар барысында 42 хаттама толтырылғанын мәлімдеді. Карантиндік шектеу шаралары басталғалы бері 468 әкімшілік құқық бұзушылық орын алып, бизнес өкілдері мен жекелеген азаматтарға 90 120 000 теңгенің шамасында айыппұл салынған. Өткен жылы барлығы 188 нысанға қатысты хаттама толтырылып, оларға 41 895 240 теңге сомасында айыппұл ілінген. Оның ішінде 17 компьютер клубы, 151 тамақтану орны, 20 тұрғын бар.
«Биылдыққа мониторингтік топ өкілдері 280 әкімшілік құқық бұзушылық туралы хаттаманың толтырылуына ықпал етіп, 48 224 700 теңге көлемінде айыппұл салынды. Мұның 3-уі заңды тұлғаға, 101-і жеке кәсіпкерлерге, 176-сы жеке тұлғаларға қатысты орын алды.
Ауданаралық экономикалық сот 21 талап-арыз материалдарының негізінде істерді қараса, 15 нысанға қатысты шешім шықты. 4 іс-құжат қараусыз қалдырылды, 2-уін қарау тоқтатылды. Алайда, соттың ғимаратты жабу туралы шешімі болмағандықтан, кәсіпкерлер басқа тұлғаның атынан қайтадан ашып, жұмыстарын жалғастырып жатыр»,- деді қала әкімінің орынбасары.
А. Сәдубаев Тараз қаласында 456 нысанның «Ashyq» қосымшасымен жұмыс істеу үшін QR-код алғанын жеткізді. Олардың қатарында кинотеатрлар, қоғамдық тамақтану орындары, фитнес клубтар, бильярд, компютьерлік, СПА орталықтары, сұлулық салондары бар. Бүгінге дейін дәмханаға барған, аталған қосымшада «қызыл» түс көрсетіп, ПТР-тесті оң нәтижемен шыққан 42 азамат анықталыпты. Ал «сары» түсті, яғни науқас адаммен байланыста болған 68 адам тіркелген. Олар үй карантиніне алынған тұлғалар болып саналады, демек өзін-өзі оқшаулау режимін бұзған.
«Бұл азаматтар дәмханаға кіргізілген жоқ. Тиісінше, жергілікті емханаларға хабарлама жіберілді. Карантиндік режимді бұзғаны үшін 4 әкімшілік құқықбұзушылық туралы хаттама толтырылды. Бір кәмелеттік жасқа толмаған жасөспірімге 5 айлық есептік көрсеткіш – 15 585 теңге көлемінде айыппұл салынса, жалпы 146 850 теңге көлемінде айыппұл ілінді», - деді спикер.