Тараз тұрғындары қаладағы ыстың иісіне шағымданды

ТАРАЗ. ҚазАқпарат - Тараз тұрғындары әртүрлі инстанцияларға қала аумағының оңтүстік-батыс бөлінен шығатын күйіктің иісіне шағым түсіріп жатыр, деп хабарлайды ҚазАқпарат тілшісі.

Әлеуметтік желілердегі Тараздың топтарында бұл мәселе кеңінен талқылануда.

«Екі аптадан бері химиялық өнеркәсіп маңы ауылында не таңертең, не кешке терезе ашу мүмкін емес болып тұр. Ыстың иісі - сұмдық сезіледі! Қайдан шыққанын кім біледі? Тұрмыстық қоқысты жағып жатқанға ұқсамайды, себебі бір иіс қайта-қайта шығады». «Иісіне шыдау мүмкін емес. Демікпесі бар адамдарға тіпті қиын», - деп қала халқы желіде наразылықтарын білдіруде.

ҚазАқпарат тілшісінің Жамбыл облысы Төтенше жағдайлар департаментіне жіберген сауалына ведомство басшысы Бағдат Данилов телефон арқылы былай деп жауап берді: «...Түтін зауыттан шығып жатыр. «Қазфосфат» ЖШС-нің минералды тыңайтқыштар зауыты жұмыс жасап тұр. Сол жерге хабарласып анықтау керек. Білуімше, тұрғындар әкімдікке шағымданған», - деді Жамбыл облысы ТЖД басшысы.