Танымал қазақстандық спортшы Қуат Хамитов Алматыдағы селден зардап шеккендерге миллион теңге аударды

АЛМАТЫ. ҚазАқпарат - «Найман» атымен танылған қазақстандық ММА спортшысы Қуат Хамитов Алматыдағы селден зардап шеккендердің қорына бір миллион теңге аударды. Бұл туралы спортшы Instagram әлеуметтік желісіндегі жеке парақшасында жазды.

Сондай-ақ танымал спортшы барлық қазақстандықтарды көмекке мұқтаж жерлестеріне көмектесуге шақырды.

Естеріңізге сала кетейік, 23 шілде күні Қарғалы өзенінде су деңгейінің көтерілуі салдарынан «Қарғалы» және «Таусамалы» шағын аудандарын су басуы орын алды. Соның салдарынан Алматы қаласының Әуезов, Наурызбай және Алатау аудандарындағы тұрғын үйлер зардап шеккен. Соңғы мәліметтер бойынша, шамамен 900 адам қауіпсіз жерге көшірілді.