+7 (701) 759 90 19
USD 412.55 EUR 468.66
RUB 5.79 CNY 58.80
Jańalyqtar

Таңдау жасайтын сәт келді - Алтай Көлгінов

2020 жылғы 26 маусым 19:40
Бөлісіңіз:
Таңдау жасайтын сәт келді - Алтай Көлгінов

НҰР-СҰЛТАН. ҚазАқпарат - Елордада инфекция жұқтырғандардың саны көбейе беретін болса, онда ірі спорт нысандары стационар ретінде әзірленеді. Бұл жайында Нұр-Сұлтан қаласының әкімі Алтай Көлгінов Facebook парақшасында жазды, деп хабарлайды ҚазАқпарат тілшісі.

«Қадірменді қала тұрғындары! Қауіпсіздігіміз үшін таңдау жасайтын сәт келді. Медицина қызметкерлері соңғы төрт ай бойы коронавирус инфекциясымен күресте алдыңғы шепте келеді. Барлық мүмкіндіктерін пайдаланып қызмет етіп жатқан дәрігерлеріміздің тіпті отбасымен қауышу мүмкіндігі болмай жүр. Күн-түн демей еңбек етіп жатқан олар – сөзсіз батыр, бірақ түсінейік, олар да адам. Жаны да, тәні де шаршайды. Бастапқыда дәрігерлердің осы күресте қалуына да, кетуіне де мүмкіндік болды. Бірақ олар қалуды ұйғарды. Сондықтан, біздің оларға осындай қиын сәтте көмегіміз бен құрметіміз – үйден шықпай, тәртіпке бағынуымыз болуы керек. Дәрігерлерге көмектесу үшін баршаңызды бір ғана дұрыс таңдау жасауға шақырамыз. Себебі медицина қызметкерлеріне дәл қазір біздің көмегіміз ауадай қажет. Түсініңіздер, дәл қазіргі сәтте олардың арқасына артылған ауыр жүкті ештеңемен салыстыруға келмейді», - деп жазды қала әкімі.

Оның дерегінше, бүгінде бірнеше бас дәрігер, жансақтау бөлімінің меңгерушісі және алғашқы күннен бері күресте жүрген тағы басқа медицина қызметкерлерінің өздері ауырып қалды. Олар осы осы уақыт аралығында бір ғана адамның өмірін сақтап қалған жоқ, жазылып шыққан мыңдаған адамның отбасыларына да шаттық сыйлады.

«Пандемия басталған тұста бізде 1 ғана стационар болса, қазір олардың саны 12-ге жетті. Зертхана да біреу ғана еді, қазір 8-і жұмыс істеп тұр. Бас кезінде 300 адамға дейін сынама тапсыра алса, қазір күніне 5,5 мың адамға ПТР-тест жасалады. Қазіргі жағдайға қарасақ, бұның өзі жеткіліксіз. Инфекция жұқтырғандардың саны көбейе беретін болса, біз амалсыздан ірі спорт нысандарын стационар етіп әзірлейміз. Науқастарға орын табылар, бірақ, оларды кім емдейді? Мемлекет жүздеген, мыңдаған төсек орынмен де, медицина құрылғыларымен де қамтамасыз ете алады. Бірақ оның бәріне оқыған маман, дәрігерлерді қайдан табамыз? Иә, біз қалаға дезинфекция жасауға, бақылау бекеттеріне жұмыс істеуге еріктілер мен әскерилерді тарттық. Бірақ адам жанын сақтап қалу үшін еріктілердің ерік-жігері жеткіліксіз. Оған арнайы медицина білімін алған маман қажет. Аяқ асты немесе асығып дәрігер дайындап шығу тағы мүмкін емес. Дәрігерлерге қолғабыс, өздеріне тәжірибе болсын деп медициналық университеттер мен колледждерден студенттерді тартып жатырмыз. Бірақ, адам өміріне араша түсе алатындай толыққанды маман болу үшін жылдар бойғы оқу мен тәжірибелі еңбек қажет екенін сіз де, біз де жақсы түсініп отырмыз», - деді Алтай Көлгінов.

Елорда әкімінің дерегінше, қалада 3,5 мың дәрігер мен 8 мың медицина қызметкері бар. Ал халық саны – 1 млн 200 мың.

«Жедел жәрдем стансасының жұмысынан мысал ретінде айтар болсақ, шақыртулар 1 мыңнан 4 мыңға дейін көбейген. Осы аптада тәулігіне 4 300 қоңырау түсті. Жедел жәрдем станциясының базасында құрылған колл-орталық сол ауыртпалықтың бір бөлігін көтеріп келеді. Сонымен қатар телеграм-бот ашып, тұрғындардың жедел көмек шақыруына жағдай жасалды. Жедел жәрдем бригадаларының санын 150-ге дейін көбейттік», - деді ол.

Оның атап өтуінше, қазір қаладағы барлық аурухана мен емхана коронавируспен күреске жұмылдырылған. Бірінші қалалық аурухананы толықтай стационарға айналдырылған. Нәтижесінде қосымша 600 орын ашылды. Соңғы 10 күннің ішінде ғана науқастарға арналған орын 1 300-ден 3 100-ге-ге, яғни үш есеге көбейді.

«Әрбір бекітілген емхана бойынша компьютер томографиясын түсіру жөнінде бірнеше республикалық клиникамен келісім жасадық. Компьютер томографиясын жасау пневмонияны бастапқы кезеңінде анықтауға мүмкіндік береді. Сонымен қатар қосымша КТ және ИВЛ аппараттарын сатып алып жатырмыз. Телемедицина тәжірибесін пайдаланудамыз. Симптомсыз тасымалдаушыларды емдеу үшін медицина қызметкерлері осы арқылы науқастың жағдайын бақылауда ұстап отыр. Симптом болған жағдайда ауруханаға жатқызылады. Арнайы оқытылған қызметкерлерден тұратын ситуациялық орталық жұмысын бастады. Олар белгілі бір мекемеде науқастардың топталуына жол бермей, коронавирус инфекциясын жұқтырған науқастарды бөліп отырады. Бұл барлық стационардың жұмысын үйлестіруге септігін тигізіп жатыр. Тиісті ақпараттар мен консультациялар алуға қолайлы COVID-19 сайты жасалды. Дүйсенбі күні іске қосылады», - деді қала басшысы.

Алтай Көлгінов енді бекітілген ережелерге жауапсыздықпен қарап, осы үйлесімді жұмыстың бәрін жоққа шығаруға болмайтындығын баса айтады.

«Қауіпсіздік шараларын сақтамағандықтан медицина қызметкерлеріне өте ауыр салмақ түсіріп жатырмыз. «Қауіп қайдан болса қатер содан« дейді. Қазіргі уақытта қауіптің де, қатердің де қайдан екенін жақсы білесіздер. Сақтықта қорлық жоқ. Өзіміз бен жақындарымыздың өміріне және өзгелердің адал еңбегіне құрмет танытып, қауіпсіздік шараларын қатаң сақтайық», - деді Нұр-Сұлтан әкімі.


Біздің каналымызға жазылыңыз:

Бөлісіңіз:

Автор:

Марлан Жиембай

Загрузка...
Пікір қалдыру
+7
Жіберу
Сондай-ақ... оқыңыз
Загрузка...
ONLAIN QYZMETKERLER
REDAKTOR
Кожакелдиев Е.
Кожакелдиев Е.
954-059
REDAKTOR
Жанибек Амангелди
Жанибек Амангелди
954-059
REDAKTOR
Жанат Қапалбаева
Жанат Қапалбаева
954-059

MURAǴAT