Талдықорғандық студенттер қоғамдық тәртіпті сақтауға атсалысуда

ТАЛДЫҚОРҒАН.ҚазАқпарат - Талдықорған қаласындағы Ілияс Жансүгіров атындағы Жетісу мемлекеттік университетінің студенттері тәртіп сақшыларымен бірлесіп, облыс орталығының қоғамдық орындарында тәртіп бұзудың алдын алу, қылмыстарды болдырмау мақсатында ұйымдастырылған рейдтерге белсенді түрде қатысуда, деп хабарлайды ҚазАқпарат тілшісі.

Шараға полицейлер, ішкі әскер сарбаздары және қоғамдық белсенді студенттер жұмылдырылды. Аталған бастама 8 қыркүйектен бастап, үш айлық мерзімде жүргізілетін республикалық «Учаске» жедел алдын алу іс-шарасы аясында ұйымдастырылып отыр.

«Біздің бастамамызды қолдаған студенттерге алғысымды білдіремін. Сіздердің міндеттеріңіз - қоғамдық орындарда тәртіпбұзушылықты болдырмау, оның алдын алу. Дегенмен, сақтық шараларын ұмытпау қажет. Біз әкімдікке полицейлердің қоғамдық көмекшілеріне төлеу мақсатында бөлінген қаржы есебінен белсенділік танытқан студенттерге ақы төлеу туралы ұсыныс енгіземіз. Сондай-ақ, қоғамдық белсенді болып келіп, қазіргі таңда полицияда қызмет атқарып жүрген жастар көп. Ендеше, Сіздердің қатарларыңыздан да тәртіп сақшылары шығады деп сенемін. Рейд барысында, ең алдымен, азаматтардың конституциялық құқығын сақтау қажеттілігін естен шығармаңдар»,- деді өз сөзінде Алматы облысы ІІД Жергілікті полиция қызметінің бастығы полиция полковнигі Марат Күштібаев.

Сонымен қатар, облыстық полиция баспасөз қызметінің хабарлауынша, осындай шаралар желтоқсан айына дейін жалғасатын болады.