Талдықорғандағы жалпықалалық сенбілікке 6 мыңдай тұрғын қатысты

None
Фото: Жетісу облысы әкімінің баспасөз қызметі
ТАЛДЫҚОРҒАН. ҚазАқпарат – Жетісу облысындағы елді мекендерді санитарлық тазалау, абаттандыру және көгалдандыру айлығының аясында Талдықорғанда жалпықалалық сенбілік өткізілді. Бұл туралы ҚазАқпарат Жетісу облысы әкімінің баспасөз қызметіне сілтеме жасап хабарлайды.

Тазалық және көгалдандыру жұмыстарына 6 мыңға жуық адам, коммуналдық мекемелердің 50 техникасы тартылды. Қаладағы әр мекеменің еңбек ұжымдары өзіне қарасты аумақтарға тазалау жұмыстарын жүргізді. Қоқыстар жиналып, арықтар тазаланды. Осы күні жалпы көлемі 900 текше метрге жуық қоқыс жиналып, шығарылды.

Облыс басшысы Бейбіт Исабаев, өңірдегі ардагерлер, үкіметтік емес ұйымдар өкілдері, еріктілер, мүмкіндігі шектеулі жандар, жастар ұйымдары «Жеңіс» саябағына мыңнан астам қылқан жапырақты ағаш отырғызды.

«Мұндай шаралар жиі өткізілуі керек. Жастар айналаны таза ұстауға, қоршаған ортаға қамқорлық жасауға үйренеді. Бүгін біз, ардагерлер сенбілікке өз үлесімізді қосып, ағаш ектік. Енді осы ағаштарды күнделікті суғарып, күтіп-баптап отырса, қаламыз бұрынғыдан да көркейе түседі деп ойлаймын. Қаланы көгалдандыру, абаттандыру, тазалау – тұрғындардың ортақ міндеті», - дейді Жетісу облыстық «Семей полигоны» қоғамдық бірлестігінің төрағасы, ардагер Толыбек Данабеков.

Биыл Жетісу облысында жалпы саны 93 мыңнан астам көшет отырғызу жоспарланған, соның 2 мыңдайы бүгінге дейін «Жеңіс» саябағына отырғызылды.



Соңғы жаңалықтар