Талдықорғанда тәртіп сақшыларының үш буыны тұрып жатыр
Сарқан ауданының тумасы Несіпбек Түстікбаев әскери борышын өтеп келгеннен кейін партия жолдамасын алып, аудандық ішкі істер бөліміне қызметке тұрады. 1980-ші жылдардың басында милиция қатарында еңбек жолын бастап, Қапал аудандық ішкі істер бөлімінің басшысы қызметіне дейін көтерілді. 35 жыл өмірін құқық қорғау саласына арнаған ардагер бүгінде өз ұрпағының әке жолымен келе жатқанын мақтан тұтады. Несіпбек Әбілхамитұлының айтуынша, ол балалары қай саланы таңдаса да қарсы болмаған. Керісінше, армандарының орындалуына, мақсаттарына жетуіне көмектесуге тырысқан. Сондықтан да болар, ұлы Марат Әбілхамитов бүгінде әке жолын қуған полиция қызметкері. Ол Талдықорған қалалық ішкі істер бөлімі, жергілікті полиция қызметін басқарады.
Марат Әбілхамитов кішкентай кезінен әкесінің жұмысын көріп өсті. Әкесінің қылмыспен күрескеніне, халыққа көмектесіп, ауыл мен ауданның тәртібін орнатуға күш салғанына қызыға қарады. Қызметтік формасына қызықты. Алдына мақсат қойып, бүгінде қаланың тыныштығын қамтамасыз етуге өзі де атсалысып келеді. 
Ал оның жары Шынар Әбілхамитова жедел басқару орталығында еңбек етеді. Мониторлар арқылы қалада орнатылған камералардан заң бұзу фактілерін анықтайды. Жедел топқа тапсырма беріп, қылмыстың алдын алып, құқықбұзушылармен күреседі. Төрт баланың анасы жолдасымен иық тіресіп, қоғамдық тәртіпті қалыптастыруға бірге күш салып жатқанына мақтанышпен қарайды.
Ал шаңырақ иесі Несіпбек Әбілхамитұлының немересі де былтырдан бері Еңбекшіқазақ аудандық ішкі істер бөлімінде жедел уәкіл болып жұмысын бастады. Биыл Ресейде жоғарғы оқуын тәмамдайтын кенже баласы да ішкі істер саласында жұмыс істесем деген мақсат қойып отыр. Демек полицейлер әулетінің қатары әлі де толыға түспек.
