Талдықорғанда коммунистер балалар құқығын қорғауды қолға алмақ

ТАЛДЫҚОРҒАН. ҚазАқпарат - Қазақстан коммунистік халық партиясы Алматы облыстық филиалының өкілдері балаларды тұрмыстық зорлық-зомбылық пен кибербуллингтен қорғау тақырыбында дөңгелек үстел ұйымдастырды. Шараға білім департаменті, ювиналды полиция өкілдері, қоғамдық ұйымдар мен аулалық клуб жетекшілері қатысты, деп хабарлайды ҚазАқпарат тілшісі.

Қазақстанның коммунистік халық партиясының мәліметінше елімізде пандемия салдарынан тұрмыстық зорлық-зомбылық 30 пайызға артқан.

Сондай-ақ балалар мен жасөспірімдерге әлеуметтік желілер арқылы «кибербуллинг» шабуылдары жиілеп барады.

Осы деректерді алға тартқан партия ел ішінде сауалнама жүргізіп, қазіргі қолданыстағы заңнамаларға өзгерістер мен толықтырулар енгізу үшін ұсыныс жинауға кірісті.

«Кейбір заңнама батысқа еліктеумен енгізілген. Бұл біздің мемлекетіміздің көзқарасына қайшы екен. Сондықтан соның барлығын қортындылап, дұрыс жолын тапсақ деп ойлаймын», - дейді партияның Алматы облыстық филиалының бірінші хатшысы Сәуле Биғарова.

Дөңгелек үстелде көтерілген мәселелердің бәрі жинақталып, партияның Парламенттегі өкілдеріне жөнелтілмек.