Талдықорғанда 180 отбасы баспаналы болды
Жаңа баспаналардың кілттері 11 санат бойынша кезекте тұрған жандарға табысталды. Олардың қатарында I, ІІ топтағы мүгедектер, толық емес отбасылар, зейнеткерлер, майдангерлерге теңестірілген азаматтар, мүгедек бала тәрбиелеп отырған отбасылар бар. 6-шағын ауданнан берілген 60 пәтерлі екі үй арендалық, ал 9 аландағы 60 пәтерлі көпқабатты баспана коммуналдық тұрғын үй.
Сондай-ақ, елорда тойында Алматы облысының әкімі бірқатар азаматтарға «Астананың 20 жылдығы» мерейтойлық медалін тапсырды. Мұндай марапатқа жалпы 196 жетісулық ие болды. Мереке айшықты концерттік бағдарламамен жалғасуда.
Жалпы, Астананың 20 жылдығына орай Алматы облысында осы күні 40-қа жуық түрлі мәдени-бұқаралық, танымдық, спорттық шаралар өтті. Мәселен бүгін Талдықорғанда «Астана» даңғылы ашылып, ал Алакөл ауданында «Бәйтерегі» бар саябақ халықтың игілігіне берілгенін хабарлаған болатынбыз. Ал ертең «Талдықорған» ипподромында ұлттық ат спорты түрлерінен жарыс өтеді.