Таксистердің денсаулығын қадағалап жатқан ешкім жоқ - Еңбек министрлігі

АСТАНА. ҚазАқпарат – Жұмыс берушілер такси жүргізушілерінің өмірі мен денсаулығына немқұрайлы қарап отыр. Бұл туралы Еңбек және халықты әлеуметтік қорғау министрлігі мәлім етті, деп хабарлайды ҚазАқпарат тілшісі.

Таксистердің өмірі мен денсаулығына жұмыс беруші жауапты болуы тиіс, яғни таксопарк иесі жұмысқа қабылдамас бұрын жүргізушінің денсаулығына қатысты тиісті құжаттарды талап етіп, тексеруі тиіс. Дегенмен, такси жүргізушілерінен сұхбат алу барысында денсаулық жағдайына қатысты анықтамалардың сұралмайтыны белгілі болды. Такси жүргізушілерін қабылдау онлайн жүреді. Ол жерде аты-жөні, көлікті жүргізу деңгейі мен автомобильдің жағдайы ғана сұралады, -

деді министрлікке қарасты еңбек ресурстарын дамыту орталығының басқарушы директоры Александра Молчановская «Қазақстанның еңбек нарығы туралы екінші ұлттық баяндама» атты онлайн-конференцияда.

Орталық басшысының мәлімдеуінше, такси жүргізушілерінің артық еңбектенуі бойынша да бақылау жоқ.

Такси бағасына келсек, таксопарктер құнды өздері белгілейді. Сонымен қатар, таксопарктер түрлі науқан өткізеді. Мысалы, апта ішінде 200-ден астам рейс жаса деген секілді. Оны естіген таксист демалыссыз күні-түні жұмыс істейді. Ал, оның денсаулығын қадағалап жатқан ешкім жоқ, -

дейді ол.

Сөз соңында министрлік өкілі аталған мәселе бойынша шұғыл шешім қабылдау керектігін айтты.