Т. Шарманов: Қазақстан медицина саласында Ресейді басып озуда
Бұл туралы бүгін Алматыда өткен «Денсаулық баршаға: Созылмалы сырқаттар. Мәселелер. Шешу жолдары» тақырыбындағы ІІ Халықаралық конгресте сөз болды.
«Бұрын мамандарды дайындау жүйесі мықты еді, қазір нашарлап кетті деген пікірмен келіспеймін. Жалпы, барлық уақытта аға ұрпақтың кейінгі толқынға көңілі толмауы қалыпты құбылыс. Қазір медицина мектебі ұтқырланып, қатты өзгерді. Ол сапалы медициналық көмек көрсетуге бағытталуда. Қазір медициналық көмек қауіпсіз және жоғары сапалы деңгейге көтерілуде. Қазақстан бұл бағытта Ресейді басып озуда», - деді ҚР ҰҒА академигі, медицина ғылымының докторы Төрегелді Шарманов.
Қазақ тағамтану академиясының және Профилактикалық медицина академиясы президентінің айтуынша, кеңестік дәуірден қалған Ресейден үйрену, үлгі алу керек деген ескі көзқарастан арылатын кез келді. Қазақстан әлемдік ықпалдастыққа жылдам бейімделуде. Медициналық кейбір қызмет түрлерін ұсынуда Қазақстанның қос бірдей денсаулық сақтау мекемесі бүгінгі таңда әлемдегі ең озық деп мойындалуда. Олар - Назарбаев Университетінің Ана мен бала ұлттық ғылыми орталығы және Республикалық нейрохирургия ұлттық ғылыми орталығы. Мұндай мәртебеге ТМД-да бұған дейін бірде-бір ел ие болған жоқ.