Сыртқы сауда палатасы қазақстандық өнімдерді Ресейде таныстырды

МӘСКЕУ. ҚазАқпарат - Мәскеу қаласында Қазақстанның Сыртқы сауда палатасы мен «Атамекен» Ұлттық кәсіпкерлер палатасы ұйымдастырған қазақстандық кәсіпкерлердің сауда-экономикалық миссиясы өтті, деп хабарлайды ҚазАқпарат ССП баспасөз қызметіне сілтеме жасап.  

Іс-шара «Мәскеу сауда-өнеркәсіптік палатасы» одағының қолдауымен жүзеге асты. Бизнес-миссия құрамына тамақ өнімдерін, электр-техникалық тауарларды, кәсіптік жуу және дезинфекциялау құралдарын өндіру саласының кәсіпорындары кірді. Атап айтқанда, тамақ өнімдері блогында кондитерлік өнімдерді, шұжық және ет деликатестерін, жылдам дайындалатын өнімдерді, табиғи бал, тосап пен компоттарды, қышқыл сүт өнімін  өндірушілердің кең спектрі болды.

Қазақстан Сыртқы сауда палатасының өкілі Дулат Омаровтың айтуынша, ССП қазақстандық өндірушілер де, ресейлік әріптестер де пайдалана алатын қолдаудың үлкен бағдарламасын ұсынып отыр.

«Қазақстан мен Ресей арасындағы тауар айналымы өткен жылы 17,5 млрд доллар  болған және бірлескен кәсіпорындар қарқынмен өскен кезде де ынтымақтастық әлеуеті сарқылмайды», - деп атап өтті Дәурен Омаров.

Ресми шаралар аяқталғаннан кейін қазақстандық және ресейлік кәсіпорындар В2В-сессиясы шеңберінде екіжақты келіссөз өткізді. Мәскеулік ритейл-желілердің өкілдері Қазақстаннан келген әлеуетті әріптестердің өнімін көріп, дәмін татты. Бұл - отандық тамақ өндірушілер үшін ресейлік ірі ритейлерлермен байланыс орнатудың зор мүмкіндігі.

Миссия қорытындысы бойынша қазақстандық және ресейлік компаниялар арасында ынтымақтастық туралы шарттарға қол қойылды.