16:12, 17 Қаңтар 2020 | GMT +6
Сыртқы істер министрлігінде Қазақстан-Түркия қарым-қатынасы талқыланды
НҰР-СҰЛТАН. ҚазАқпарат - ҚР Сыртқы істер министрінің бірінші орынбасары Шахрат Нұрышев Түркияның жаңадан тағайындалған Елшісі Уфук Екиджиді қабылдады, деп хабарлайды ҚазАқпарат.
«Кездесу барысында тараптар екіжақты саяси-экономикалық және мәдени-гуманитарлық байланыстарды талқылады. Сондай-ақ Түркия Елшісі сенім грамотасының көшірмесін тапсырды», - делінген ҚР СІМ мәліметінде.
Қазақстан мен Түркия арасындағы тауар айналымы 2019 жылдың қаңтар-қараша айларында 2,8 млрд АҚШ долларын құрады. Бұл 2018 жылдың осы кезеңіне қарағанда 67% көп (1,5 млрд доллар). Экспорт көлемі 2 млрд доллар, ал Түркиядан Қазақстанға импорт 0,8 млн долларды құрады.