Сыбайлас жемқорлыққа қарсы қызмет қызметкерінің жаңа куәлігі таныстырылды

None
None
НҰР-СҰЛТАН. ҚазАқпарат - Бүгін ҚР Сыбайлас жемқорлыққа қарсы іс-қимыл агенттігі Кадр жұмысы департаментінің басшысы Нұрлан Жақсымбетов агенттік қызметкерінің жаңа үлгідегі қызметтік куәлігін таныстырды, деп хабарлайды ҚазАқпарат тілшісі.

«Бүгін сіздердің назарларыңызға агенттік қызметкерінің қызметтік куәлігінің жаңа үлгісін ұсынғым келіп отыр. Неліктен біз ескі форматтан бас тарттық? Біріншіден, сыбайлас жемқорлыққа қарсы іс-қимылдың жаңа үлгісін парасаттылық идеологиясы негізінде ілгерілете отырып, өткеннің нышандары мен рәміздерінен арылу өте маңызды. Қалыпша түріндегі куәліктер қоғамда жағымсыз қабылданатындығы ешкімге құпия емес және оның теріс пайдаланумен, шектен шығумен түсіндірілуі дұрыс саналады», - деді ол.

Оның атап өтуінше, екіншіден, бұл жаңа үлгі үнемді және функционалды. Жаңа куәліктерді әзірлеу құны ескіге қарағанда 2,5 есе арзан. Бұл куәліктердің көмегімен агенттіктің әкімшілік ғимараттарына кіру жүзеге асырылады. Үшіншіден, барынша сенімді 6 қорғаныс жүйесі бар. Сондықтан оны қолдан жасау тәуекелі жоқ.

«Ал жалған қағаз қызметтік куәліктерін жасау деректерінің көп екендігі мәлім. Өкінішке қарай мұндай фактілер сыбайлас жемқорлыққа қарсы қызметті де айналып өткен жоқ. Жақында ғана халықаралық іздестіруде жүрген алаяқтың жалған қалыпша куәлікті пайдаланғаны туралы факті анықталды. Осындай алаяқтар өздерін сыбайлас жемқорлыққа қарсы іс-қимыл агенттігінің қызметкері ретінде таныстырып, пайдакүнемдік мақсатта адамдарды адастыру нәтижесінде жұмысымызға нұқсан келтіреді. Азаматтардың сенімін бұзады», - деді ол.

Н. Жақсымбетовтың айтуынша, төртіншіден, бекітілген формат халықаралық стандарттарға сәйкес келеді.

«ЭЫДҰ елдерінде пластик ІD карталарды полиция, арнауы қызметтердің және мемлекеттік органдардың қызметкерлері баяғыдан пайдаланып жүр», - деді Кадр жұмысы департаментінің басшысы.

Соңғы жаңалықтар