Су тасқынынан зардап шеккен Оразақ ауылында «Бірге қалаймыз» акциясы мәресіне жетуде - Ақмола облысы (ФОТО)
Аталған акцияның басты мақсаты - табиғат апатынан зардап шеккендерге көмек қолын созу арқылы қиын кезде ақмолалықтардың жұдырықтай жұмыла біле алатынын көрсету болды. Айта кетейік, шара барысында облыстың 17 ауданы мен 2 қаласынан келген құрылысшылар тасқын судан зардап шеккен Оразақ ауылының тұрғындары үшін салынып жатқан екі пәтерлі 100 үй мен 132 қора-қопсысын тұрғызуға елеулі үлес қосты. Игі шараға 250-ге жуық құрылысшы қатысты. Қазіргі кезде 6 ауданнан келген еріктілер жұмыс істеуде, қалған асарлықтар өз жұмыстарын абыроймен аяқтап, үйлеріне қайтты. Бурабай ауданынан барған Олег Тимофеев 6 шаруашылық құрылысты салуға көмектесті. «Жақын адамдарға көмектескеннен асқан шаруа жоқ. Тұрғындар қатты зардап шегіп, көп қиындықты бастарынан өткерді», - дейді Олег Тимофеев. Ал степногорлық Жәнібек Әбдірәсілов болса 2 үйді құрылысына атсалысып, қазір үшінші үйді тұрғызуда. Еске сала кетсек, құрылысшылардың барлығына еңбекақы төленуде. 1 қарашаға дейін екі пәтерлі 67 үй дайын болады. Қазірдің өзінде 42 үй пайдалануға беріліп, 92 отбасы баспаналы болды.